Lëvizja Vetëvendosje e Albin Kurtit, është regjistruar në Gjykatën e Tiranës. Fillimisht si një organizatë jofitimprurëse, por me synimin e qartë, për t’u shndërruar në një forcë politike mbarëkombëtare. Kjo lëvizje vjen pikërisht në një kohë, kur janë shtuar zërat për një marrëveshje historike mes Kosovës dhe Serbisë, për njohjen reciproke si shtete.
Kjo sipas presidentit serb Aleksandër Vuçiç dhe atij kosovar Hashim Thaçi, do të përfshijë disa korrigjime territoriale të dyanshme. Serbia do marrë veriun e Mitrovicës dhe Kosova 3 komunat me shumicë shqiptare në Serbinë e Jugut. Shkëmbimet territoriale, kundërshtohen me forcë nga një pjesë e mirë e partive dhe shqiptarëve në të dyja anët e kufirit, me Vetëvendosjen në krye.
Presidenti amerikan Donald Trump, ka thënë se i pret sa më parë në Shtëpinë e Bardhë Vuçiçin dhe Thaçin, për të nënshkruar marrëveshjen e paqes. Burime të ndryshme diplomatike, thonë se kjo do të ndodhë maksimumi në fund të këtij viti, ose fillimin e vitit tjetër, përpara fillimit të fushatës presidenciale në SHBA.
Vetëvendosja, angazhohet të punojë për një bashkim sa më të shpejtë mes Shqipërisë pa Kosovës, pa asnjë lëshim apo shkëmbim territorial me Serbinë. Vetëvendosja ka realizuar protesta të mëdha në të shkuarën, shpesh me përplasje të dhunshme, dhe madje edhe me viktima në Prishtinë, për të kundërshtuar krijimin e bashkësisë së komunave serbe në Kosovë, apo marrëveshjen për kufirin Kosovë-Mali i Zi.
Se sa do t’ia dalë në synimin e saj, kjo mbetet të shihet. Mjerisht, historia ka treguar se kufijtë janë ndryshuar përgjithësisht, nën diktatin e fuqive të mëdha, dhe nga udhëheqës pas dyerve të mbyllura, duke shpërfillur vullnetin e popujve./ Tirana Today
