Risia e sapo publikuar nga Clubhouse quhet ‘Backchannel’. Brenda aplikacionit Android dhe homologut të tij iOS, një buton i ri në formën e një aeroplani prej letre, shumë i ngjashëm me ikonën e Telegramit, hap ‘derën’ e bisedave me tekst në platformën e bërë deri tani të famshme nga bisedat vetëm audio.
Ikona është e pranishme sapo hapet aplikacioni, në të djathtë poshtë dhe pranë “Start a Chat”. Duke klikuar menunë, ju futeni në bisedë, ku mund të lexoni dhe shkruani mesazhe për miqtë tuaj dhe t’u përgjigjeni kërkesave të miqve nga ata me të cilët nuk jeni lidhur ende dhe të cilët, në këtë mënyrë, mund të prezantohen.
Backchannel ofron si mesazhe individuale ashtu edhe biseda në grupe dhe, sipas zhvilluesve të programit, shton më shumë shkathtësi në rrjetin social. Për shembull, moderatorët e një grupi komunikimi mund të planifikojnë paraprakisht ose të koordinojnë në kohë reale ndërsa drejtojnë një dhomë. Përdorimi i Backchannel është gjithashtu i dobishëm për të lexuar pyetje nga dëgjuesit gjatë një shfaqjeje të drejtpërdrejtë, nëse ata nuk mund ose nuk duan të flasin. Kur je në një ‘dhomë’, butoni i bisedës shfaqet në plan të parë, në të djathtë. Kjo thjeshton ndërveprimet me pjesëmarrësit. Sidoqoftë, funksionaliteti është ende i rrallë, pavarësisht se është lëshuar globalisht.
Në fakt, nuk është e mundur të dërgoni imazhe ose video, por vetëm tekste dhe link-e, edhe kompania shpjegon se: “Ka shumë veçori shtesë për të cilat po punojmë në lëshimin e versionit të dytë”. Pastaj ka disa pyetje në lidhje me privatësinë: a janë të koduara mesazhet? A mund t’i lexojë Clubhouse ose t’i ruajë? Për momentin, pas dërgimit të një teksti, ai nuk mund të fshihet por vetëm të kopjohet ose raportohet, në rast abuzimi./TIRANA TODAY
Aplikacioni ‘Clubhouse’
Në hapësirën e mediave sociale është shfaqur një lojtar i ri që quhet “Clubhouse”. Por ndryshe nga platformat e tjera të mediave sociale, ajo nuk është e hapur për të gjithë. Korrespondentja e ‘Zërit të Amerikës’, Mariia Prus i hedh një sy kësaj platforme që u bë me shpejtësi e njohur.
Autorja e suksesshme Rahaf Harfoush po mban një diskutim në një platformë të re të mediave sociale të quajtur, “Clubhouse”. Për të paktën dy deri në tre orë në ditë, tre herë në javë ajo drejton shfaqje, merr pjesë në aktivitete dhe ndjek disa të tjera. “Ka kuzhinierë dhe producentë filmash, sipërmarrës, artistë, shkrimtarë dhe atletë. Dhe të gjithë gjejnë grupin e përshtatshëm dhe të gjithë mendojnë se si mund të kontribuojnë”, thotë ajo.
Zonja Harfoush thotë se diskutimet më interesante ndodhin në grupe të mbyllura. Por edhe në dhoma dixhitale të hapura ka shumë për të dëgjuar: shfaqje të drejtuara nga njerëz si Elon Musk, Mark Zuckerberg ose Jared Leto. “Ju faleminderit që më ftuat, jam i kënaqur që jam me ju”, thotë Vlad Tenev, shef ekzekutiv për kompaninë Robinhood. “Vlad, na trego se çfarë ndodhi, na jep informacionin e brendshëm”, thotë Elon Mask. Në rrjet mund të marrësh pjesë me ftesë dhe tani për tani gjendet vetëm në iPhone.
Platforma nuk lejon diskutime të regjistruara – përveçse kur folësi jep një leje të veçantë. Dhe aftësia për të arkivuar disa biseda mund të jetë një nga arsyet që së fundmi u rrit ndjeshëm numri i përdoruesve të “Clubhouse”, nga 600’000 në 8 milionë, duke e çuar vlerën e kompanisë në 1 miliard dollarë. “Kjo u mundëson pjesëmarrësve që të kenë një përvojë audio në kohë reale, njësoj si një bisedë në grup me zë, por mund të lidhesh me njerëz që nuk i njeh akoma, ose mund të lidhesh me miqtë e tu”, thotë analisti i teknologjisë, Jeremiah Owyang i kompanisë “Kaleido Insights”.
Zoti Owyang deri tani ka identifikuar pothuajse 30 konkurrentë të ngjashëm me “Clubhouse” dhe deri në fund të vitit parashikon që të ketë më shumë se 100. Një defekt i madh janë çështjet e privatësisë: përdoruesit duhet që gjithmonë ta marrin si të mirëqenë që po regjistrohen. Por kjo nuk është e gjitha. “Për shembull, ngacmimi në internet ose keqinformimi ose veprime të tjera keqdashëse ose njerëz që thjesht kryejnë mashtrime ose madje edhe informacione të rreme që përhapen nga aktorë të shteteve të huaja dhe nga çdo vendndodhje e mundshme në botë”, thotë ai.
Tani për tani, “Clubhouse” është falas, por ekspertët thonë se në të ardhmen kompania mund të konsiderojë mundësinë e anëtarësimit me pagesë dhe të reklamave.
