Në kohën kur ERE kishte marrë vendimin që më datën 1 tetor të ndryshonte fasha e energjisë, dje kryeministri Edi Rama bëri me dije se vendimi nuk do të hyjë në fuqi sot. Shkak, sipas kryeministrit, u bë sasia e reshjeve të rëna në ditët e fundit dhe përmirësimi i nivelit të Fierzës.
Qeveria vendosi të anulojë këtë të premte hyrjen në fuqi të vendimit që parashikonte që duke nisur nga 1 tetori e gjithë sasia e energjisë mbi fashën 800 kilovat/orë të paguhej me çmimin 42 Lekë për kilovat/orë. Zv/kryeministrja dhe njëkohësisht ministrja e Infrastrukturës dhe Energjisë, Belinda Balluku, ka folur gjatë edicionit të lajmeve në “TV Klan” në lidhje me këtë vendim. Sipas saj, energjia është një shërbim bazik që i përket çdo qytetari dhe nuk ka lidhje me politikën.
“Për të thënë të drejtën, nuk kemi ndjerë ndonjë presion të opozitës. Më vjen keq që e them këtë, për sa i përket energjisë. Mënyra si menaxhojmë energjinë nuk është politike. Unë respektoj opozitën kur duhet të bëjë opozitë, por kur thotë gjëra që nuk kanë bazë, duhet të themi të vërtetën.
Energjia nuk ka asnjë lidhje me politikën. Energjia është shërbim bazik që i përket çdo qytetari shqiptar. Dhe sa mirë e menaxhojmë ne e tregojnë faktet dhe numrat. Dhe si menaxhohej dikur energjia kur nga kaskadat prodhoheshin edhe 11 terra, ndërkohë që ne në 2020 kemi prodhuar më pak se 3.7 terra për shkak të thatësirës, opozita nuk mund të thotë shumë gjëra.
Opozita e ka pasur energjinë në dorë, dhe i ka lënë shqiptarët në 2005, 2006, 2007, e në vazhdim me nga 5 orë drita në ditë dhe me shkëputje mbi 3-4 orë, opozita e cila vërtetë sot i ka pasur të gjitha mundësitë që të tregojë se si mund të menaxhohet energjia në Republikën e Shqipërisë.
Ne përveç faktit që po optimizojmë prodhimin e kaskadës, jemi duke punuar me një plan afatgjatë i cili nuk ka nisur me krizën, ka nisur që në 2019, për diversifikimin e burimeve. Synojmë që në vitin 2030 sistemi ynë i prodhimit të ketë plus 4 terravat për vit, të shtuara që do të kthejë Shqipërinë në një vend eksportues dhe jo importues të energjisë.
Këto nuk janë projekte në letër siç opozita bënte dikur, siç thoshte për Skavicën që sot e nëm dhe mallkon, dikur opozita thoshte që Skavica ishte ëndrra e shqiptarëve. Ndërkohë ne zakonisht nuk i lemë ëndrrat, por i marrim dhe i bëjmë realitet. Kështu që mirë e ka opozita, por nuk e kemi ndjerë presionin e opozitës. Nuk merremi me presionet e opozitës, merremi me vendimmarrje të cilat janë në të mirë të qytetarëve”.