Prokuroria Themelore në Prishtinë, përmes Departamentit për Krime të Rënda dhe në bashkëpunim të ngushtë me Policinë e Kosovës, ka realizuar sot një operacion në fshatin Rimanisht të Komunës së Prishtinës, ku janë arrestuar dhjetë persona, përfshirë edhe shtetas nga Shqipëria.
Të arrestuarit dyshohen për përfshirje në veprat penale “Prodhimi dhe përpunimi i paautorizuar i narkotikëve, substancave psikotrope, analoge, apo mjeteve dhe materialeve narkotike”, sipas nenit 268 të Kodit Penal të Republikës së Kosovës, si dhe për “Mbajtje të paautorizuar të armëve në pronësi, kontroll apo posedim”, bazuar në nenin 366 të të njëjtit Kod.
Gjatë operacionit, autoritetet kanë sekuestruar një sasi të madhe narkotikësh, armë zjarri, si dhe prova të tjera materiale të cilat do të përdoren në vijim të hetimeve. Prokurori i shtetit, në bashkëveprim me Policinë e Kosovës, ka dalë menjëherë në vendin e ngjarjes për të ndjekur nga afër zhvillimet.
Personat e dyshuar janë ndaluar dhe ndaj tyre do të kërkohet caktimi i masës së paraburgimit brenda afateve të parashikuara me ligj. Prokuroria ka theksuar përkushtimin e saj të vazhdueshëm në luftimin e veprave penale që rrezikojnë rendin dhe sigurinë publike.
