Gjykata e Durrësit caktoi sot masën e sigurisë “detyrim paraqitje” për nëndrejtorin e Kadastrës së Durrësit, Arben Isaku. Ky i fundit, akuzohet për “korrupsion pasiv”, “shpërdorim detyre” dhe “falsifikim të dokumenteve” për legalizime.
Isaku u vetëdorëzua në polici ditën e djeshme, pasi ishte shpallur në kërkim prej disa ditësh. Ai u mbajt për disa muaj në përgjim, nga ku ka rezultuar se në cilësinë e drejtorit të ALUIZNI-t në Durrës ka legalizuar me tituj pronësie dy persona, të cilët kanë paraqitur dokumente të falsifikuara.
Bëhet fjalë për dy truaj në zonën e plazhit në Durrës, përkatësisht 123 metra katrorë dhe 500 metra katrorë, që janë përfituar nga dy të rinj, një nga Durrësi dhe tjetri nga Berati, në dëm të pronarit të vërtetë të tokës.
Bashkë me Isakun, akuzohen dhe specialisti i Kadastrës së Durrësit, Flavio Rexha dhe ekonomisti, R.K.. Edhe për dy bashkëpunëtorët e Isakut, Gjykata e Durrësit vendosi ”detyrim paraqitje”.
