Gjyqtarja Mimoza Margjeka e cila mori 6 mijë euro për të liruar të burgosurin, është përplasur sot me policët, të cilët e kanë shoqëruar për në Gjykatën e Posaçme, për ta marrë në pyetje mbi akuzën për korrupsion. Me tone të larta, ajo i është drejtuar policëve se e dërguan në bodrumin e një gjykate tjetër, dhe jo te Gjykata e Posaçme.
Margjeka ka kundërshtuar mënyrën e shoqërimit, sipas së cilës, nuk ka pasur një police grua, siç e parashikon ligji, dhe pretendon se e gjitha është një proces i stisur pasi nuk ka njohur zgjedhjen e Valbona Sakos në krye të Bashkisë së Durrësit.
“Kam 5 orë që pres policinë, që të vijnë të më shoqërojnë. Në 09:30 jam bërë gati dhe kam njoftuar avokatin dhe të gjithë. Nuk ka shkresë shoqërimi. Unë nuk kam asnjë, janë stisje të shtetit. Një police femër nuk kishit, dhe më çuat në bodrum. Unë nuk jam njeri ordiner, kur ma bëni mua.
Një urdhër e kanë marrë dorazi se kanë harruar, harrojnë gjyqtarin që e bën zhele për dy ditë, ca i bëni njerëzve ju. Është e turpshme, po më dhemb koka. E kam pritur një vit që pres të më arrestojnë. Jam e kënaqur që e bën. Gjykata të kontrolloj dokumentet, se i bëjnë mbrapa”, tha ajo.
Pjesë nga debati i gjyqtares me policët dhe gazetarët:
Margjeka: Kam 1 vit që pres që këta të vijnë të më arrestojnë. Jam e kënaqur që e bënë.
Polici: Të lutem
Gjyqtarja: Më jep urdhrin, se i bëni gjërat kështu. Është e frikshme situata juaj. Mos fol mo zotëri, pse flet? Ti bërë punën tënde. Më trego urdhrin e shoqërimit. Pse i bëni gjërat mbrapa? Ju nuk dinit ku do më çonit, është e turpshme. Më çuan në bodrumin e gjykatës, ju thashë ‘ku më çoni, se kam frikë nga ju’.
Mimoza Margjeka, e komanduar si gjyqtare në Apelin e Durrësit, u vu në pranga pasi akuzohet se ka përfituar 6 mijë euro, në mënyrë të paligjshme për të nxjerrë nga qelia personin e identifikuar si Orion Bali, i arrestuar nga Prokuroria pranë Gjykatës së Shkallës së Parë Pogradec, për veprën penale “Ndihmë për kalim të paligjshëm të kufijve”.
