13 kandidate të PDK-së për Kuvendin e Gjakovës janë prezantuar në Gjakovë, ku ishin të pranishëm ministrja Dhurata Hoxha, deputetet Sala Berisha-Shala, Evgjeni Thaçi, Safete Hadërgjonaj si dhe kryetari i Degës së PDK-së dhe njëherësh deputet, Hajdar Beqa.
Me anë të një postimi, ministrja Hoxha theksoi se përbërja e kësaj liste siguron nivel të lartë përfaqësimi dhe fitore për PDK-në, duke garantuar përfaqësim dinjitoz në Kuvendin e Gjakovës jo vetëm për gratë.
“PDK-ja edhe në Gjakovë, prijetare në përkrahjen e grave, nominoi më shumë gra se parashihet me kuotën gjinore”, shkruan ndër të tjera Hoxha.
Postimi i plotë i ministres Hoxha:
“Me kënaqësi mora pjesë në prezantimin e kandidateve për Kuvendin e Gjakovës, nga Lista e Partisë Demokratike të Kosovës. Përbërja e kësaj liste, siguron nivel të lartë përfaqësimi dhe fitore për PDK-në, duke garantuar përfaqësim dinjitoz jo vetëm për gratë.
Në Gjakovën e dijes e kulturës, të punës e universitetit, në Gjakovën e sakrificës dhe përkushtimit për shtet, Gruaja Demokratike ka dhënë përgjigje të qëlluar të përfaqësimit ndaj sfidës së 22 Tetorit.
PDK-ja edhe në Gjakovë, prijetare në përkrahjen e grave, nominoi më shumë gra se parashihet me kuotën gjinore, andaj, jo vetëm 13 kandidateve për Kuvendin komunal, por edhe Listës së PDK-së dhe kandidatit për kryetar, Ramadan Hotit, urime dhe suksese! Urime ndryshimi!”.
