Eurokomisioneri për Zgjerimin, Johanness Hahn dhe shefja e diplomacisë së Bashkimit Evropian, Fredericha Mogherini kanë kërkuar që politika shqiptare të veprojë me përgjegjësi për të zgjidhur krizën politike në vend.
Në një deklaratë të përbashkët, ata apelojnë që të ndalen sulmet ndaj reformës në drejtësi, duke iu referuar akuzave të kreut të opozitës, Lulzim Basha, mbi procesin e vettingut.
“Na vjen keq për bojkotin parlamentar në Shqipëri dhe për faktin se opozita nuk është regjistruar ende për të marrë pjesë në zgjedhje.
Debati politik nuk duhet të bëhet jashtë, por brenda parlamentit sipas praktikës demokratike. Qytetarët meritojnë një udhëheqje, që të jetë e përgjegjshme për veprimet e saj.
Ne edhe një herë i bëjmë thirrje të gjithë liderëve politikë që të veprojnë me përgjegjshmëri, me respekt për institucionet, dhe të hapin rrugën për zgjedhje demokratike, në përputhje me standardet ndërkombëtare.
Më konkretisht, reforma shumë e nevojshme e drejtësisë në Shqipëri, është edhe një herë nën sulm. Ne u bëjmë thirrje të gjitha palëve për të përfunduar formimin e institucioneve të verifikimit.
Ata që sulmojnë reformën gjyqësore, në vend që të sigurojnë zbatimin e verifikimit, me monitorimin e ngushtë të Operacionit Monitorues Ndërkombëtar, dëmtojnë të ardhmen e Shqipërisë.
Ne presim që anëtarët e Parlamentit të tregojnë përgjegjshmëri, zotësi për të vepruar brenda kornizës demokratike legjitime institucionale, dhe se ata qëndrojnë nga ana e popullit të Shqipërisë, të cilët vazhdojnë të kërkojnë përfundimin e reformës në gjyqësor, pasi si një veprim vendimtar i hap rrugën vendit për të hyrë në Bashkimin Evropian”, theksojnë ata.
