Teksa zhvilloi një takim me shkrimtarët në çadër, Basha ritheksoi se Partia Demokratike nuk do të regjistrohet në KQZ për zgjedhjet e 18 qershorit.
Jo vetëm kaq, por Basha bëri thirrje për pjesëmarrje në protestën e 7 majit, e cila do të mbahet në Kavajë.
Në këtë ditë, qytetarët e Kavajës do t’u drejtohen kutive të votimit për të zgjedhur kreun e ri të Bashkisë, ndërsa opozita shprehet e bindur për të mos i lejuar këto zgjedhje.
Kreu i PD-së tha se protesta do të jetë paqësore, ndërsa theksoi se nuk do të lejojë zhvillimin e zgjedhjeve fasadë.
“Koalicioni opozitar i mbledhur sot në afatin e fundit të limiteve ligjore të regjistrimit, ka vendosur njëzëri mosregjistrimin e opozitës në zgjedhje, deri në arritjen e një pakti kombëtar politik. Më 7 maj le të mblidhemi së bashku në një protestë kombëtare në Kavajë, një protestë paqësore. Ne jemi të vendosur dhe nuk do të lejojmë zgjedhje fasadë. Jemi për dialog, jo monologje sa për të kaluar radhën. Bëmë propozime për ta nxjerrë vendin nga kriza. Opozita nuk do të regjistrohet në zgjedhje. Ngrihemi bashkë për zgjedhje të lira e të ndershme. Pushteti duhet të burojë nga qytetarët, Rama e do reformën në drejtësi për pushtetin e tij. Koha e republikës së vjetër po perëndon.”
