Forcat Shqiponja kanë vënë në pranga Aurel Deliun, 34 vjeç, banues në Nikël. Ai u kap në posedim të një arme zjarri pistoletë, teksa po lëvizte me një automjet.
Burimet policore bëjnë me dije se i riu ishte në shoqërinë e një personi tjetër gjatë kontrollit të ushtruar nga forcat Shqiponja. Aurel Deliu është i skeduar dhe ka precedent penal; më parë, në vitin 2021, ai u arrestua në Tiranë bashkë me një tjetër person, ndërsa dy të tjerë u shpallën në kërkim, pasi nuk iu bind urdhrit të policisë për kontroll.
Ngjarja e vitit 2021 ndodhi pranë zonës së “Xhamllikut” në Tiranë, ku katër të rinj – tre nga Kruja dhe një nga Tirana – udhëtonin me një mjet tip “Volkswagen” dhe kundërshtuan urdhrin e patrullës së Shqiponjave, duke u konfrontuar fizikisht me policinë. Gjatë kontrollit, policia sekuestroi një sasi të konsiderueshme parash në euro dhe lekë, celularë, gërshërë për prerjen e lëndës narkotike Cannabis Sativa, një portofol me stemën e policisë dhe armën e njërit prej të rinjve.
“Nga specialistët për Hetimin e Krimit në Komisariatin e Policisë Nr. 4 u bë arrestimi në flagrancë i shtetasve A. D. dhe A. T., 29 vjeç, ndërsa në kërkim u shpallën M. H. dhe B. K., pasi kundërshtuan me dhunë punonjësit e Policisë. Gjatë kontrollit të automjetit u gjetën dhe sekuestruan një sasi e konsiderueshme parash në euro dhe lekë, sende që përdoren për prerjen e lëndës narkotike, një portofol me stemën e policisë dhe katër celularë, së bashku me automjetin,” njoftoi policia.
