Të paktën 153 persona kanë humbur jetën në Sri Lanka pas rrëshqitjeve të dheut dhe përmbytjeve të shkaktuara nga Cikloni Ditwah, ndërsa 191 të tjerë rezultojnë të zhdukur dhe më shumë se gjysmë milioni njerëz janë prekur në mbarë vendin.
Më shumë se 78 mijë persona janë zhvendosur në gati 800 qendra ndihme, kryesisht të ngritura në shkolla, tha Qendra e Menaxhimit të Fatkeqësive në Sri Lanka, citon The Economic Times.
Mijëra policë, personel i marinës dhe trupa të ushtrisë po shpërndajnë ushqime, po pastrojnë rrugët dhe po evakuojnë familjet e bllokuara në vende të sigurta.
Mallika Kumari, shtëpia e së cilës u përmbyt shpejt deri në çati të premten, është një nga të strehuarat në këto qendra ndihme. Ajo, së bashku me bashkëshortin, futi tre fëmijët e saj në një kamion me qira dhe e kaluan natën buzë rrugës.
Kumari dhe 554 fqinjët e saj jetojnë përgjatë lumit Kelani në Malwana, 20 km larg Kolombos, dhe po përballen me përmbytjen më të rëndë në një dekadë.
Varkat e shpëtimit po transportojnë familjet e bllokuara, përfshirë edhe Kumarin, e cila shpresonte të merrte rrobat dhe librat e shkollës së fëmijëve nga shtëpia e saj.
“Fillimisht dëgjova paralajmërimin për përmbytje në televizor, por nuk e prisnim që lumi të tejmbushej kaq shpejt. Thjesht u nxituam të dilnim nga shtëpia pa marrë asgjë,” i tha Kumari Reuters-it.
“Ende nuk kemi ngrënë mëngjes. Dy nga djemtë e mi janë ftohur. Duhet t’u marr ilaçe. Kam sjellë disa qese mbeturinash për të mbledhur rrobat e tyre.”
Në nxitim e sipër, Kumari la pas macen e saj, e cila më vonë u mor nga një varkë e marinës dhe u soll në tokë të thatë.
Shtëpi të mbytura në ujë dhe pa energji
Përmbytjet në Malwana dhe zona të tjera pranë Kolombos kanë lënë shumicën e shtëpive nën ujë dhe pa energji elektrike.
Autoritetet meteorologjike kanë parashikuar reshje të vazhdueshme gjatë fundjavës, duke shtuar frikën për përmbytje të tjera në rajonet tashmë të mbushura me ujë.
Disa banorë zgjodhën të qëndrojnë në katet e sipërme të shtëpive pjesërisht të përmbytura, duke mbrojtur sendet e tyre.
Bizneset lokale, përfshirë farmacitë, supermarketet dhe dyqanet e tekstileve, janë përmbytur, duke shtuar shqetësimet për humbje financiare ndërsa pronarët e dyqaneve janë të shqetësuar për rikuperimin afatgjatë.
Në xhaminë Dalugala Thakiya, vullnetarët përgatitën pako me oriz, pulë dhe ushqime të tjera për viktimat e përmbytjes, duke synuar të rrisin kapacitetin deri të dielën.
“Po marrim më shumë kërkesa për ushqim sepse njerëzit që bëjnë punë të përditshme nuk gjejnë dot punë dhe po u mbarojnë kursimet,” tha Risham Ahmed, një nga organizatorët e vakteve.
“Ata janë të shqetësuar se si do t’i rindërtojnë jetët e tyre.”
