Pandemia duket se nuk ka ndikuar që pushuesit të kalojnë pushimet në destinacione të ndryshme. Kjo fundjavë ka nisur me lëvizjen e turistëve nga Kosova, të cilët zgjedhin të pushojnë në bregdetin shqiptar.
Sot nga ora 05:00 deri në orën 07:00, kufirin e kanë kaluar plot 8 mijë qytetarë. Mësohet se mijëra qytetarë të Kosovës, duke respektuar edhe masat e sigurisë, i janë drejtuar bregdetit, ku ndër më të preferuarit kanë qenë Durrësi dhe Shëngjini.
Fluksi i lartë i qytetarëve që duan të hyjnë në Shqipëri, ka bërë që pika doganore e Morinës të punojë me 6 sportele dhe me procedurë të përshpejtuar, për të shmangur radhën kilometrike të krijuar. Ndonëse numri i të infektuarve është në rritje, kjo nuk i ka ndalur aspak pushuesit të ‘arratisen’ drejt Shqipërisë.
