Kryeministri Edi Rama ka marrë pjesë paraditen e sotme në konferencën për 25-vjetorin e Gjykatës Kushtetuese. Rama u shpreh i kënaqur me këtë institucion, teksa tha se Gjykata Kushtetuese ka krijuar besueshmeri në sytë e të gjithëve, duke dhënë vendime të paanshme.
Gjykata Kushtetuese është një nga institucionet më të rëndësishme për garantimin e rendit kushtetues në Shqipëri. Gjatë veprimtarisë së saj që nga krijimi më 1992, Gjykata Kushtetuese është përballur me një sfidë të pazakonshme në vakumin e plotë të traditës, dhe përballë mijëra çështjesh të natyrave dhe përmbajtjeve të ndryshe, duke krijuar vit pas viti një traditë të pasur.
Vend për kritika me siguri mundtë ketë, dhe ka, por nëse ka një institucion të gjyqësorit shqiptar ku sot mund të hyhet pa të ardhur turp, është pikërisht Gjykata Kushtetuese.
Nisur nga fakti që një kohë të shkurtër, Gjykata Kushtetuese ka qenë e detyruar të merrej me vendime shumë të rëndësishëm, e vërteta është se ky organ është përpjekur të shfaqet i paanshëm në gjykimet e veta. Nuk ndodh shpesh në jetën e një institucioni që të fitojë simpati dhe mbështetje popullore, siç ndodhi me këtë gjykatë pas vendimit historik për çështjen e kufirit detar. Ishte një nga ato vendime që definojnë imazhin, karakterin dhe rrugën e një institucioni për dekada. Gjykata Kushtetuese u bë gjykata e mbrojtjes së sovranitetit kushtetues dhe shtetëror të republikës të Shqipërisë.
Ju uroj sukses të gjithë gjykatësve në një rrugë që është e gjatë dhe e mundimshme për të vazhduar reformën në drejtësi sepse e dimë që drejtësia është një fjalë që e përdorim me vend dhe pa vend, por që në veshët e shqiptarëve tingëllon pa kuptim. Jam i bindur që në fund të rrugës, Shqipëria do t’ia dalë mbanë./ Tirana Today