Policia Rrugore në Dibër ka vijuar kontrollet e intensifikuara gjatë javës së kaluar për të identifikuar dhe ndëshkuar shkelësit e Kodit Rrugor. Pjesë e këtyre kontrollimeve ka qenë monitorimi me dron i akseve rrugore të qarkut, me fokus kryesor evidentimin e parakalimeve të gabuara, të cilat paraqesin një rrezik të lartë për përfshirje në aksidente rrugore.
Si rezultat i monitorimit, janë konstatuar 107 parakalime të gabuara. Drejtuesit e mjeteve janë ndëshkuar me gjoba që variojnë nga 2000 deri në 3000 lekë të rinj.
Policia ka theksuar se ky është një masë parandaluese për të reduktuar rrezikun e aksidenteve dhe për të siguruar rendin dhe sigurinë në akset rrugore.
‘Gjatë javës që lamë pas shërbimet Policisë Rrugore të DVP Dibër kanë intensifikuar monitorimet me dron të akseve rrugore të qarkut me qëllim evidentimin dhe ndëshkimin e shkelësve të Kodit Rrugor, kryesisht të atyre që kryejnë parakalime të gabuara, rrezik potencial për përfshirje në ngjarje rrugore. Si rezultat i monitorimit me dron janë evidentuar 107 parakalime të gabuara dhe janë ndëshkuar me masë administrative nga 2000 deri në 3000 lekë të rinj’, thuhet në njoftim.
